July 23, 2015
პირველი აგვისტოდან ელექტროენერგიის ტარიფი 4 თეთრით გაიზრდება
ეკონომიკის ექსპერტის, ემზარ ჯგერენაიას განცხადებით, პირველი აგვისტოდან 31 დეკემბრის ჩათვლით ელექტროენერგიაზე ტარიფები 4 თეთრით გაიზრდება.
როგორც ჯგერენაიამ „პირველ პრესკლუბში“ განაცხადა, ტარიფი სამივე კატეგორიას გაეზრდება 60%, 40% და 35%-ით.
„არსებული სიტუაციისთვის სამი სახის ტარიფია: 1. სოციალური 7 თეთრიანი ტარიფი, რომელიც 11 თეთრი გახდება; მეორე 11 თეთრიანი ტარიფი, რომელიც 15 თეთრი გახდება და მესამე 15 თეთრიანი ტარიფი, რომელიც 19 თეთრი გახდება. პროცენტულად ასე გადანაწილდება ტარიფები: 60 %-ით პირველ კატეგორიას ეზრდება, მეორეს – 40%-ით, ხოლო მესამე კატეგორიას 35%-ით“, – განაცხადა ჯგერენაიამ.
ექსპერტის თქმით, ტარიფების გაძვირება სამმა მიზეზმა განაპირობა.
“პირველი მიზეზია, რომ ელექტროენერგეტიკის ბიზნესში რეფორმა, რომელიც 2007 წელს დაიწყო, ჯერ კიდევ არ დამთავრებულა. მეორე ფაქტორია ლარის გაცვლითი კურსის მერყეობა, ამან საკმაოდ დიდი ზეგავლენა იქონია. ხოლო მესამე მიზეზს წარმოადგენს ის, რომ მარტო “თელასს” გააჩნია თავისი გენერაციის ობიექტი, დანარჩენები კი მთლიანად შესყიდულ ელექტროენერგიას ყიდიან“, – აღნიშნა ჯგერენაიამ.
ექსპერტის განმარტებით, ტარიფების ზრდა სამომხმარებლო პროდუქციაზე ფასების ზრდასაც გამოიწვევს.
„როგორც ინფორმაცია მაქვს, სოციალურად დაუცველ ოჯახებს სახელმწიფო სუბსიდირებას გაუკეთებს, მაგრამ ძირითადში დენის ტარიფი, როგორც ჩვეულებრივი მოსახლეობისთვის, ასევე ბიზნესისთვის და საწარმოებისთვისაც გაიზრდება. აქედან გამომდინარე, ეს პროცესი საკმაოდ მტკივნეულად იქნება აღქმული. სავარაუდოდ, ინფლაცია აგვისტოს თვეში 7%-მდე გაიზრდება, ხოლო ბიზნესი ნაკლებად კონკურენტუნარიანი გახდება. ტრიფების გაზრდას, ასევე, წარმოების გაძვირება მოჰყვება, შესაბამისად პროდუქცია, მათ შორის, პურის ფასებიც გაიზრდება“, – განაცხადა ექსპერტმა „პირველ პრესკლუბში“.
ავტორი: ხატია წულაია
წყარო: www.pia.ge
